සහජ ජාති, කුල, ගොත් ආගම්
ගනිමි කරටම, රකිමි මිරිකා
අනෙකාගේ බොටුව
වෙන් කරන් කඳෙන් හිස
තබන්නෙමි සීරුවෙන්
උඩු යටිකුරු කර තනාගත්
අනේකවාදී වහන්තරා මත
ආශිර්වාද ශ්ලෝකයන්, ස්තෝත්‍රයන්
ඇසෙනු ඇත ගිගුම් දී
සැම සවන් විනිවිදනු ඇත
සීනු ඝණ්ටා නොනැවතී
කෙසින් අල්වා ගෙන උගේ හිස
කරන්නෙමි මස්තකප්‍රාප්ත
සදොස් පූජාසනය මත.....
රුධිර දහරා නොනැවතී
ගලා යයි ඌ හිසින්
අත් මගේ රතුම රතු බව
දකින මම ගැස්සෙමී
කාරි නැත විස්සෝප වීමට
මේ ගලා යන රුධිර ගංගා,
තිරිසනුන්ගේය
නොවේ ඒවා මිනිස් රුධිරය
වහන්සේලා ශපත කරත්
බැතිමතුන් භක්තියෙන් තියත් හූමිටි
බලයි මාදෙස වීරයකු විලසින්...
බලමි නැවතත් දෑත් දෙස මාගේ
පහව ගොස් ඇත රත් පාට දෑතේ
ස්වාර්ථයෙන් මුස්පත්ව
බලන්නෙමි සතර අත
ඇසෙන්නේ නැත විලාපයක්
පෙනෙන්නේ නැත කවන්ධයන්
රත් පැහැති රතු වයින් දහරා
මත නටමු අපි වීරයන් විලසින්.....
No comments:
Post a Comment